沒有項目！
 |
|
|
Hello 我叫King Lo, 係一位土生土長既香港人亦係婚禮攝影師，太太因為97移民到加拿大之後於2006年回流返港既加拿大公民，另外我地有一位4歲既囝囝。其實我地由2018年囝囝出世就決定未來日子會回流返加拿大。
我地原先計劃囝囝讀完小學就回流加拿大，當然計劃同現實一定有差別，係2019年相信大家都知道香港發生重大事件，亦因為呢個原因及小朋友既將來，我地決定將原本待囝囝小學畢業後回流既計劃推前至幼稚園畢業就離港回加。慶幸2019年5月因工作關係，我同太太可以有機會返卡加利及溫哥華視察環境，為之後回流做好選擇及準備。但事與願違，2019年尾新冠疫情來襲，令到香港各行各業既生意都停頓，當然亦包括我地兩公婆所經營既婚禮生意都一樣嚴重受創，同時受制於香港既疫情限制對我地生意上既影響，同時國安法既實行，加上由2019後香港人真真實實見到都好多社會及傳媒上既不公平對待及無理，例如蘋果、立場、言論自由既打壓，無論大人及小朋友，未來香港生活環境上將會出現好多無形既紅線，無奈令自己及小朋友產生巨大壓力，所以我地又將回流計劃推前，以完成手頭上客人訂單後就回流返加拿大為目標。所以岩岩好，2021年下旬終於可以完成哂所有客人，真正開始安排回流。成件事都好似上天安排一樣，好似不停推我地一家三口快D離開呢個住咗好多年又熟悉又陌生既地方，最終令我地比原定計劃快咗好多年去落實。 |
|
|
因為太太及囝囝都已經係加國公民，所以整個申請都只係處理我自己本人，成件事都簡單得多，而申請過程都好順利，終於係2022年3月中可以拎到Land 紙，亦可以跟原先時間一樣係3月底飛黎加拿大卡加利定居。
係香港限聚既限制下，遺憾未能同所有親戚好友親身道別，亦最唔捨得屋企人，難免為咗小朋友將來而放棄在港家人，心裡面有D唔好受，亦有好多傷感。到離開當日，因我地航班比較早，所以都無要求家人朋友黎送機，但有一位老友晨咁早就黎送我地，仲記得係香港機場離境大堂果刻感覺，望住呢位認識廿幾年老友，加上機場內好多離別景像，同時好多位朋友致電道別，眼淚不自覺已經流出黎。呢個情景及感覺到呢一刻仍然存在，就好似岩岩發生一樣。亦因為呢種感覺無時無刻提醒我及家人為嘜野要過黎加拿大居住，要記住「毋忘初心」，時刻要珍惜加拿大既自由。 |
|
其實我地同好多剛到步香港人一樣，出發前有好多擔憂，例如 交通、住宿、工作、自己及小朋友對環境適唔適應等等.......問題不停係腦海出現。 正所謂識人好過識字，我地黎到卡加利後好多事情都好順利， 得到好多住係卡加利香港人幫忙，買車搵屋得到好多人協助先可以到步後兩個月內處理好哂，順順利利建立一個真正自己嘅家。 而我地都比想像中更快更容易適應加拿大生活，小朋友黎到加拿大反而鍾意咗返學，始終加拿大返學功課少，而且教育方法唔同香港，唔會用死背爛做既方式去教小朋友，所以對囝囝黎講係開心好多。日常生活我地覺得比香港好好多，尤其生活洗費方面無咁大壓力。所以壓力少D生活亦開心D，唔再好似香港一樣成日憂柴憂米擔心呢樣擔心果樣。 |
|
|
講咗咁耐以上都係小弟小小既分享，希望唔會悶親大家。 相信各位香港人都係同一個主要原因而離開香港移居海外，亦因為2019年開始種種因素及景況，令到一班真．香港人團結起黎，亦因為咁去到外地大家都互相幫助，大家亦會記得「毋忘初心」，希望大家可以係卡加利繼續keep 住2019年個種團結力量。同時亦需要珍惜及感激加拿大給予香港人既機會。自由既空氣得來不易，大家加油。 |
|
|
香港人．加油
小人物King Lo
凡惠顧任何攝影套餐，可享八五折優惠。
|
|
