九十後嘅青年人
- 編號： 移民故事 – 九十後嘅青年人
- 截止日期： 已截止報名
- 名額： 有空缺
-
收費：
- CA$0.00
沒有項目！
黎左Calgary個半月，算叫做適應左加拿大嘅文化同節奏，呢度節奏其實好快，只不過當地人相對有耐性，明白大家無論說話口音或生活習慣都有差異，所以包容性相對較大。萬事起頭難，千祈唔好當加拿大係天堂咁，乜都係最好，反而要放低自己以前嘅一切，從新開始，例如：自己做簡單汽車維修保養、買餸煮飯、家頭細務同埋砌家俬，樣樣都要親力親為，呢方面真係要努力去適應。
啱啱黎到有好多文件手續同埋物品添置嘅事項要處理，真係好多謝不同谷的谷友幫忙車出車入、提供資訊同埋建議，等我地可以好快settle down。遠親不如近鄰，大家黎到Calgary好快就會有好深嘅體會，大家都係香港人，過到黎遇到識講廣東話嘅朋友千其唔好怕醜，放開懷抱認識彼此，會有意想不到嘅收獲。係香港大家一得閒就玩手機碌IG，到左加拿大你會發現人同人之間嘅距離拉近咗，無論何時何地，認識與否，都總會有人撩你吹水，抄牌都係等閒事，大家千其唔好大驚小怪。鄰居之間得閒又會吹下水，交換情報同食物，呢份人情味係香港確實係無咁濃。
加拿大係一個職業無分貴賤嘅國度，但大多數工種都要求有license，以保障返消費者嘅權益。另外呢度揾到都好靠人脈，當然香港人識兩文三語都係一個優勢黎，大家黎到唔好氣餒，比啲時間總會揾到份適合自己嘅工。
Calgary其實都唔少人會講廣東話，好有親切感。我相信只要香港人係有心，去邊度都唔會難到我地。但黎之前真係要睇多啲YouTube或者做多啲資料搜集，要清楚了解自己將會面對咩困難同挑戰，例如：氣候、語言、生活模式嘅改變等。抱有合理嘅期望，黎到會冇咁大落差，相對就會容易啲適應新生活。但畢竟人在異鄉，適應新生活，有時都會覺得有壓力同迷失，希望係Calgary嘅香港人享受自由嘅同時，將香港文化好嘅一面帶入Calgary。